吴文忻乳癌复发扩散淋巴腺人生观价值观大有改变：担心咁多做乜呢

综合新闻 2024年10月25日 19:24 696 admin

吴文忻

听日（17日）踏入50岁嘅吴文忻（现改名吴忻熹Nathaliie），1998年参选港姐夺季军入行，早前接受传媒访问自揭两年前曾患乳癌，今年第三期复发，并扩散至淋巴腺，所以要做化疗同免疫治疗。积极治疗面对嘅佢喺网上分享抗癌经历，并指喺接受数次化疗后出现严重脱髮副作用，而两位囡囡Scarlet及Season就帮佢剃光头，又到泰国接受新疗法抗癌，以正面心态面对病情。

日前佢接受传媒访问，虽然当日係佢喺泰国接受细胞治疗返香港冇几耐，不过佢嘅精神状态及体力都不错，讲嘢仲好有中气。佢直言自己嘅人生观及价值观喺复发后有好大嘅改变，之前嘅自己有好多嘅担心同计划，但而家就会觉得唔需要，因为随时都可以冇命享。另外，佢之前觉得自己仲有大把时间，所以佢会怪责自己行动追不上想法，佢话自己最大嘅问题係净係识得谂，谂完就当做咗，患癌教识佢要活在当下，谂到嘅嘢要即刻做。

吴文忻表示以前嘅自己只要有问题发生，一定会先指责，指责其他人去年自己舒服啲，不过其实喺指住人嘅同时，有三只手指係指住自己。佢觉得好多嘢都係源于自己，係自己谂到好似好惨，但其实好多人比自己惨。

喺接受传媒访问中，吴文忻表示相识四十几年嘅彭秀慧係最明白佢，话说有一日佢啱啱完成第一次化疗，当时佢啲中学同学都未知，但咁啱有人喺群组约聚会，跟住佢就上载一张插喉相。之后，一年班开始已经同佢好好朋友嘅彭秀慧就即係问佢咩事，不停打电话比佢。彭秀慧同佢讲叫佢「唔使咁强㗎」，可以显露软弱嘅一面，仲叫佢喊出嚟。吴文忻听到后即刻爆喊，因为佢觉得彭秀慧最明白自己，嗰时嘅佢好负面，觉得而家先第一次做化疗，仲有年几点捱，唔通要摊年几。跟住彭秀慧开始鼓励佢，彭秀慧仲话到自己表姨甥喺美国患癌，期间喺社交网站分享化疗及抗癌嘅日子。

吴文忻表示之前自己压力爆煲都唔知，揸车、行街或者睇紧电视都会无啦啦流眼流，而依家好少嘢已经可以令佢感动，特别係朋友嘅支持同爱护，而家佢唔会强忍泪水。吴文忻认为正面嘅力量係有感染力，佢提及到自己喺两年前确诊并做手术，不过就冇咗化疗，当时佢连屋企人都冇讲。去到今次复发，佢觉得越嚟越严重，所以唔讲唔得。去到做化疗前一星期，佢终于鼓励勇气同囡囡讲，原本佢唔知点样同佢哋讲，但一讲完原来佢哋觉得冇乜嘢，佢就发觉所有压力、情绪及各样嘢都係源于自己。

佢两个囡囡都好支持佢，成日锡佢个头，而佢哋嘅生活亦好正常，令佢唔觉得自己係一个病人。佢表示喺啱啱做化疗及未做化疗时，身体状况比较差，不过而家就好好多。

最后，佢坦言得知患癌后，佢第一时间问点解係自己，食得健康又有做运动嘅习惯，但好多人都忽略照顾心灵，因为心灵好重要，所以自己要同自己多啲沟通，而佢觉得冥想係一好好嘅方法。佢觉得患癌除咗心活习惯及饮食之外，其中一个原因係心灵及情绪出问题。所以佢喺患癌后，同理心大咗好多，仲话如果自己可以康复嘅话，好想用呢个力量去帮助人。