爆一爆｜财经演员L君 诱健身教练接的士牌火棒（Louise）

股市经历完四日大牛市后仍有余韵，唔少手头冇股票嘅散户仍然心痒痒，想入市搵转快钱，加上银行既定存利息又係咁落，所以金融界一啲牛鬼蛇神又起动「搵食」。

下载财经APP

美股外币即时报价 多国新闻任睇

近日有位前舒适堡兼PURE嘅瑜伽教练向小妹请教，问某某财经网站是否「正路」？原来佢哋一班教练联群结队去听咗一个投资讲座，个布景板招牌就係用该财经网站作招倈，而讲者就係所谓嘅独立股评人L君，亦係一间名不见经传嘅上市公司主席。

班教练俾$8000上四堂，学下点样玩期权，捕捉下市场个波幅，希望可以一赔十揾餐晏仔。近排股市波动，听到啲教练个个心郁郁。但期权学费非L君嘅大茶饭，戏肉係-的士牌呢种另类投资工具。

的士佬形像负面就係人都怕，政府顺势推出措施规管班的士佬，有时同的士佬吹水，佢哋都识得噏：「政府迟早引入滴滴出行，想取谛我哋的士牌，老实讲俾你揾咗几十年，仲唔益下其他人！」所以的士牌价又点会有运行呢？的士佬仲叫小妹到马鞍山一块烂地望一望，有唔少断供的士在晒太阳。

投资讲座上 L君向学员推介投资的士牌，话宜家市价要300万，不过佢就有办法可以帮学员200万买得到。佢仲话头几年可以有保证嘅租金回报，近排定期息口下跌，谓投资的士牌就月月有息收咁啦。可能L君又真係有办法同车行或银行攞到啲断供嘅的士牌，但又係咪咁值搏呢？

其实呢招透过健身教练去散货，早有前科。在微讯女未出现前，金融界嘅牛鬼蛇神，也是透过「四肢发达」嘅健身教练在上堂时放股票冧把来散货。以前细价股炒到不亦乐乎之际，喺上环有间好大型嘅健身中心，啲生意好旺，楼上有好几家证券行，不时有「金融财俊」 落去签单买program，一百几十万算是等闲，不过就係透过啲教练上 group class 时顺便唱下股票咁啰 ！

当然教练自己亦炒埋一份。嗱，桥真係唔怕旧。时到今日，一班教练人浮于事，又成为金融小鳄嘅目标。老实讲，的士牌个市场都係控制喺几个炒家手上，哪有市价？正所谓你话个牌价几多都係假嘅，成交到先至係市价，小妹投资乜都先要谂Exit Plan，即係如果落叠买个的士牌，将来点甩到手呢？